Lǝ nya hǝnhrǝn nya ŋɔŋrɔ ǝ kpa xó ǎ, tó kpǝkpǝdǝŋ Wíclìfú-Bénɛ́n kidǝ SILÚ Tógò-Bénɛ́n tɔ jǐ ǎ, ǝdɔ́ sugbɔ̀ nyi cɔ̀cɔ̀ d'ǝ̀tǝ tɔ i nyi wɔ̀wɔ̀ i ɖo cáwó gbǝ lǝ wɔ̀wɔ̀ ǝ mɔ̀ji yikɔ̀. Lǝ ǝdɔ̀ wɔ̀wɔ̀ hunna wó gblǎmǝ ǎ, mi co mi ǎ hrǝn: ǝnu gɔ̀mǝ kúkú dǝ àgùnɛ̀gbǝ ye wǝma kù wó jǐ nyi cɔ̀cɔ̀ d'ǝ̀tǝ tɔ i nyi wɔ̀wɔ̀; ɖǝɖǝ dísa wǝma kù hunna wó tɔ nyi wɔ̀wɔ̀ nǝ àgùnɛ̀ dukɔ́n, àzán kǝ lǝ kɔ̀siɖagblǎmǝ wó ŋkɔ̀ wó dǝ àgùnɛ̀gbǝ mǝ kidǝ wreti kǝ lǝ ǝ̀xó ǎ mǝ ǎ wó ŋkɔ wó dǝ àgùnɛ̀gbǝ mǝ ǎ wó nyi ɖǝɖǝ disa tɔ nǝ àgùnɛ̀ dukɔ́n, ǝnu kpakpra wǝma àgùnɛ̀gbǝ mǝ tɔ nyi wɔ̀wɔ̀ i do. Ǝnu kpakpra wǝma àgùnɛ̀gbǝ mǝ tɔ ǎ, kavǝtakpo (100) i wó ɖǝdo i mi xɔɛ̀ lǝ 29/08/2022. Gbɔ̀xó ǝnu kpakpra wǝma lǎ nyi xɔ̀xɔ̀ tɔ ǎ, amǝ wiadrǝ (17) to ǝnujrò amǝ wó tɔ mǝ ǎ cɔ gbǝta bǝ y'ǝwó ǎ nyi ǝnukpramǝtɔ àgùnɛ̀gbǝ mǝ tɔ. Wó xɔ̀ kpakpra dǝ kpakpra jǐ tɔ ji có 03 jǝ 13 nǝ Ǝgbǝɖihɛ̀n wreti 2021 keke i xɔ̀ kúnnuɖǝ wǝma lǝ Àgùnɛ̀/Bénɛ́n. Amǝ wiatɔ́n bùlɔmǝ wó cawó xɔ́ kpakpra dǝ kpakpra jǐ hunna mɔ̀ki tɔ ji có 22 nǝ Vùvɔ̀ wreti jǝ 02 nǝ Ǝ̀zò wreti 2022 lǝ Glitó/Tógó. Ǝ̀xɔ̀ kǝ nyi ǝnu kpakpra dǝ àgùnɛ̀gbǝ mǝ xɔ̀ i wó hún dǝ àgùnɛ̀ dukɔ́n Bénɛ́n kidǝ Tógó tɔ mǝ ǎ wù amǝwo. Ǝnukpravi kǝ lǝ xɔ̀ kpakpra dǝ kpakpra jǐ dǝ nya àgùnɛ̀gbǝ hǝnhrǝn nya àgùnɛ̀gbǝ ŋɔŋrɔ jǐ ǎ wó wù kavǝtakpo lǝ Bénɛ́n kidǝ Tógó. Wo lǝ wɔ̀ ǝdɔ́ dǝ wǝma kǝ la ɖǝ nǝ fránsegbǝ dǝ àgùnɛ̀ ǎ cá jǐ i lǝ ma diŋdimǝ ǎ wǝma hunna cà la dò.
Ǝnukpramǝtɔ àgùnǝgbǝ tɔ kǝ xɔ nyanyan ji lǝ Àgùnɛ̀ lǝ Ǝgbǝɖihɛ̀n wreti 2021
![Ǝnukpramǝtɔ Togo tɔ wó Ǝnukpramǝtɔ Togo tɔ wó](/sites/www.agunegbe.com/files/styles/large/public/2022-09/IMG_20220902_131317_387_0.jpg?itok=fP4oNdUO)
Ǝnukpramǝtɔ àgùnǝgbǝ tɔ kǝ xɔ nyanyan dǝ nyanyan ji lǝ Glito/Togo lǝ Ǝzo wreti 2022
![Ǝnukpramǝtɔ àgùnɛ̀gbǝmǝtɔ bɔbɔnu amǝatɔ kǝ xɔ kpakpra i wo dǝ wo do lǝ ǝnuɖuati wreti 2023 Ǝnukpramǝtɔ àgùnɛ̀gbǝmǝtɔ bɔbɔnu amǝatɔ kǝ xɔ kpakpra i wo dǝ wo do lǝ ǝnuɖuati wreti 2023](/sites/www.agunegbe.com/files/styles/large/public/2023-05/IMG_20230526_121621_306.jpg?itok=KDJNSy-L)
Ǝnukpramǝtɔ àgùnɛ̀gbǝmǝtɔ bɔbɔnu amǝvǝatɔ kǝ xɔ kpakpra i do lǝ Ǝnuɖuati wreti 2023